“YES Mongolia” ТББ-ын Баян-Өлгий аймгийн салбар зөвлөлийн даргаар Зархум овогтой Онгар сонгогдлоо

“YES Mongolia” ТББ-ын Баян-Өлгий аймгийн салбар зөвлөлийн анхдугаар хуралдаан 2026.5.03-ны өдөр болж, гишүүдийн 100 хувийн саналаар Баян Өлгий аймгийн Авто тээврийн төвийн дарга Зархум овогтой Онгарыг даргаар сонголоо.

Тус хуралд аймгийн салбар салбарын төлөөлөл болсон 100 гаруй гишүүн оролцож, сонгуулийн зарчмаар 27 тэргүүлэгч, 3 хяналтын хорооны гишүүнийг сонгосон болно.

Хуралдаанд “YES Mongolia” ТББ-ын Удирдах зөвлөлийн ажлын албыг төлөөлж Дэд тэргүүн Л.Ганболд, Удирдах зөвлөлийн гишүүн А.Азжаргал, Б.Сүх-Эрдэнэ, Д.Отгонбаатар, А.Ербол, Бага хурлын гишүүн П.Түмэнцэцэг, Эдийн засгийн хорооны гишүүн Ш.Дауренбек, Спортын хорооны гишүүн Д.Баттуул нар оролцож, салбар зөвлөлийн батламж, тугийг гардууллаа.

Хурлыг нээж “YES Mongolia” ТББ-ын Удирдах зөвлөлийн гишүүн Д.Отгонбаатар үг хэлж, нээлтийн үгэндээ “YES Mongolia” ТББ-ын тэргүүн Л.Дашдэмбэрэлийн мэндчилгээг дамжуулсан бөгөөд П.Түмэнцэцэг “Улс төрийн нөхцөл байдал, анхаарах асуудал” сэдвээр илтгэл танилцуулж, хэлэлцүүлэг өрнүүлсэн юм.

Мөн Баян-Өлгий аймгийн Өсвөрийн “Хурдан” клубын гишүүдтэй уулзаж, үйл ажиллагаа, цаашдын хөгжлийн чиглэл, хамтын ажиллагаа боломжийн талаар дэлгэрэнгүй санал бодлоо солилцож, сурагчдын оролцоог нэмэгдүүлэх, ур чадварыг дэмжих, тогтмол, үр өгөөжтэй үйл ажиллагааг өргөжүүлэх чиглэлд санал нэгдэж, цаашид хамтран ажиллахаар болов.