МЭНДЧИЛГЭЭ
Эрхэм анд нөхөд, хүндэт YES-чүүд ээ,
Та бүхэндээ “YES Mongolia” холбоо байгуулагдсаны 10 жилийн ойн баярын мэндийг хүргэе!
2015 онд одоогийн УИХ-ын дарга, МАН-ын дарга Ням-Осорын Учралын санаачилгаар найзуудын хүрээнд эхэлсэн клуб маань өнөөдөр салбар бүрт манлайлагч 3,600 гаруй залуусыг нэгтгэсэн байгууллага болон өргөжин хөгжжээ. Миний бие, “YES Mongolia” холбоо үүсгэн байгуулагдсан цагаас нь гар бие оролцож ирсэн хүний хувьд 10 жилийн ойн энэ онцгой мөчид Тэргүүнээр сонгогдон ажиллаж буйгаа нэр төрийн хэрэг хэмээн бэлгэшээж байна.
Үе үеийн тэргүүнүүдийн хичээл зүтгэл, гишүүдийн санаачилга, идэвхийн үр дүнд манай холбоо 21 аймаг, 9 дүүрэгт салбар зөвлөлтэй үндэсний хэмжээний байгууллага боллоо. Бид үйл ажиллагаагаа уламж өргөжүүлж, 2025 онд Япон болон БНСУ-д анхны гадаад салбар зөвлөлөө байгуулж, Тайланд, АНУ-д салбар зөвлөл байгуулах бэлтгэлээ хангаад байна.
YES-чүүд бол нөхөрлөлийн үнэ цэнийг эрхэмлэж, нийтлэг үнэт зүйлсийнхээ дор нэгдэж чаддаг залуус. Үүсгэн байгуулагдсан цагаасаа гишүүдийнхээ ажил мэргэжил, салбарын өсөлтийг дэмжих зорилгоор мэргэжлийн хороодуудыг байгуулж ирсэн. Өнөөдөр 11 салбар хороо үйл ажиллагаа явуулж байна. Тэд бол манай холбооны мэдлэг, туршлага солилцох, хамтын санаачилгыг өрнүүлэх гол талбар болсон бүтэц юм.
Цаг үе өөрчлөгдөж, байгууллагын цар хүрээ тэлэхийн хэрээр бидэнд бодлогын түвшний шинэчлэл хийх шаардлага тулгарч байна. Тэргүүнээр сонгогдоод, 2025 онд Удирдах зөвлөлөө хоёр удаа хуралдуулж, алсын хараа, эрхэм зорилго, жилийн зорилт, бүтцийн шинэчлэлээ батлуулснаар гишүүн төвтэй бодлогыг хэрэгжүүлэх сууриа бүрдүүллээ.
Цаашид бид гишүүдийн хөгжлийг гол төвд нь тавьж, гишүүн бүр санаачилга гарган манлайлах боломжтой нээлттэй, хүртээмжтэй орчинг бүрдүүлэхэд анхаарна. Мөн гишүүдийн сонирхол, хобби, амьдралын хэв маягт тулгуурласан сонирхлын клубуудыг байгуулснаар оролцоо олон талт болж, дотоод соёл бэхжих нэг үндэс болох юм.
10 жилийн ойн энэ онцгой жилд YES-чүүд бидний хувьд бахархал, урам зориг болсон үйл явдал тохиолоо. Холбооны үүсгэн байгуулагч, Бодлогын зөвлөлийн гишүүн Н.Учрал Монгол Ардын Намын даргаар сонгогдож, УИХ-ын даргын албанд томилогдсон нь бидний үнэт зүйл, хамтын зүтгэл, залуусын манлайллын үнэ цэнийг улс орон даяар батлан харуулсан түүхэн үйл явдал байлаа. Энэ бүхэн YES-чүүдийн өмнө өргөн боломж нээхийн зэрэгцээ илүү өндөр хариуцлага, ёс зүй, манлайллыг шаардаж байна.
YES-ийн түүх үргэлжилж байна. Бид хамтдаа Монголын ирээдүйд YES гэж хэлсээр байх болно!
L. Dashdemberel
Лхагвасүрэнгийн ДАШДЭМБЭРЭЛ
“YES Mongolia” ТББ-ын Тэргүүн,
Удирдах зөвлөлийн дарга, Үүсгэн байгуулагчдын нэг,
Монгол Улсын Их Хурлын Тамгын газрын Дэд дарга